Umunyamabanga Mukuru w’Umugambwe CNDD-FDD yahaye umubonano mu biro vyo ku murwa mukuru w’Ubutunzi Bujumbura, Uwuserukira igihugu c’Uburusiya mu Burundi ambasaderi Valery Mikhaylov.
Uwo mushitsi yarazanye ubutumwa bw’Umugambwe urongoye igihugu mu Burusiya witwa mu mfunyafunyo y’igifaransa Russie Unie cosigurwa nk’Umugambwe uharanira Uburusiya bwiyunze.
Muri ubwo butumwa, harimwo rero kwifuriza indongozi n’abanywanyi bose b’Umugambwe CNDD-FDD umwaka mwiza biyemeza na ntaryo gukomeza birushirije ubucuti n’imigenderanire hagati y’iyo migambwe ibiri.
Ambasaderi Mikhaylov yabandanije akeza Umugambwe CNDD-FDD ku ntabwe igihugu giteyeko haba mu kubungabunga amahoro n’umutekano, guhimiriza abenegihugu gukorera hamwe imigambi y’iterambere n’ibindi.
Uwo mushitsi yarongeye arashimira Umunyamabanga Mukuru ku kugene yama yitavye ubutumire bwo gushigikira ibikorwa vy’Umugambwe Russie haba mu kurungika intumwa canke ubutumwa. Yagiriyeko mbere amutumira mu nama nkuru izobera i Moscou mu kwezi kwa Ndamukiza uwu mwaka turimwo, yagize ati: » Imigenderanire iri hagati y’ibihugu vyacu, imigambwe yacu hamwe n’abenegihugu bacu ni ukuyikomeza mbere ahubwo dushire n’u,ukono ku masezerano hagati y’imigambwe yacu ibiri. »
Umunyamabanga Mukuru Reveriyano Ndikuriyo yarashimiye uwo mushitsi w’iteka kuri ubwo butumwa bunezereje yari azaniye Umugambwe, arashima kandi imigenderanire myiza iri hagati y’ibihugu vyacu n’imigambwe yacu biguma bitera intambwe ukwo umwaka utashe. Agirako anamenyesha ko ubwo butumire bawobwitabana urweze na rirya hari n’ayo masezerano azoca asinywa.
Mu bisata rero Umugambwe CNDD-FDD wifuza gushimirako mu migenderanire na Russie Unie ni ibijanye no guhanahana ubumenyi mu gukomeza Umugambwe, itunganywa neza ry’akazi, iterambere ry’urwaruka riciye mu nyigisho, gutegura imigambi y’iterambere n’ibindi bisata vya nkenerwa mu gihugu.
Hambavu y’ivyo biyago bijanye n’ibikorwa vyorangurirwa hamwe, barahanahanye ivyiyumviro kuri poritike igezweho kw’isi n’ingene ibihugu bihangana n’abashaka kubikurako ubwigenge, abashaka kudindiza iterambere bafatira ibihano ibihugu, abashaka kwinjira mw’itunganywa ry’ibihugu n’ibindi.
Laisser un commentaire